فى البوست السابق قمت بعمل تقرير عن السيد /: أحمد البدوى , وبعد عمل التقرير , ذهبت أتجول فى شوارع مدينة طنطا أنا وبعض الاصدقاء , وشاهدنا العجب العجاب , رأينا خير اللهم اجعله خير , حالة من التسيب والاهمال , والفساد تعم جميع أرجاء المدينة , ولنبدأ من أول ما شاهدناه , هذه اللوحة موجوده فى شارع البورصة , الشارع التجارى الرئيسى فى المدينة , وقد استرعت اللوحة انتباهى , فقمت على الفور بتصويرها , كشىء غريب , أو غير مألوف ان نراه
وعندما خرجنا من شارع البورصة , فى اتجاهنا الى شارع البحر , الشارع الرئيسى والاهم فى المدينة , وفى بدايتة لاحظت , هذه الكنيسة التى يتم ترميمها , وقال لى صديق من طنطا , أنه فى بداية عملية الترميم , قامت قوات الامن بوضع , اكثر من ثلاث عربات أمن ملركزى فى جوار الكنيسة , تحسبا , لأى أعمال عنف , ولكن عندما وجدوا , انه لاشىء يحدث , ولا ينتظر أن يحدث أى شىء , قاموا بسحبها تدريجيا
وتداعت الى ذهنى على الفور , مناداة بعض الجهلاء بحذف خانة الديانة من البطاقات , شىء غريب فعلا , يعنى واحد اسمه مايكل هيكون ايه يعنى غير مسيحى , مش محتاجه انى انظر الى خانه الديانة , ولا واحد تانى اسمه مصطفى ولا محمد هيكون ايه غير مسلم , وبرضة مش محتاج انى انظر الى خانه الديانة , عشان أعرف كده , انما لو عايزين يحصل اندماج حقيقى يبقى مفيش داعى للحساسية الشديدة فى التعامل مع الامور التافه , زى ترميم كنيسة , او بناء كنيسة , أو غيرهوبعدين ايه لازمة حارس الامن الموجود على باب الكنيسة ده, هيحميها من مين , حقيقى مش فاهم , فى رأيى أن المشكلة الحقيقية تقبع تحت ستار الانتماء , هل ننتمى الى اسلامنا أولا ام الى مصريتنا , وهل ننتمى الى الدين المسيحى بالدرجة الاولى أم الى مصر , عندما نجيب على هذا السؤال , لن نحتاج بعدها الى هذه الدعاوى الفارغة , وحتى لا أطيل فلكل مقام مقال , ودعونا نتابع
بعد الكنيسة دى بخطواط موجود لوحة ممنوع الوقوف قطعيا , ولاحظت أن الاوتوبيس واقف هناك وبيحمل كمان , مع العلم انه على بعد اقل من 30 متر يوجد موقف للاوتوبيس
ودى صورة المكان المخصص لوقوف الاوتوبيس وطبعا مبيقفش هناك
وبعدين واحنا ماشيين , لقينا اللوحة دى , المكان الموجود فيه الخيمة دى , المفروض انه مكان انتظار للسيارات , فأنا اقترح على ادراة المرور الاتى , اما أن يقوموا بازالة اللوحة , أو ازالة الخيمة , ويجعله عامر
ودى لوحة أخرى ممنوع الانتظار , واللى واقفة دى عربية شرطة , يعنى من الاخر كده حاميها حراميها , وكل عام وانتم فى الانتظار
وبعد ذلك , اثناء سيرنا وصلنا بالقرب من سنترال طنطا , ووجدت رجل يرتدى جلابية يخرج من السنترال وهو يقول يلعن ابوكم ولاد ***, فاسترعى ذلك انتباهى , وذهبت للرجل وتحدثت معه , فقال لى , انه عندما يقوم رئيس الشركة المصرية للاتصالات بعمل تخفيض على رسوم تركيب خطوط التليفون , يقوم سنترال طنطا بوقف التعاقد فى فتره التخفيض , وبعد انتهائها , يقومون بفتح التعاقد , وقد تكرر ذلك أكثر من مرة , وهم الان واقفين التعاقد حتى أخر العام , أى حتى انتهاء فترة التخفيض , وقد تأكدت من ذلك بنفسى , يعنى فساد من الاخر
وبعد ما مشينا شوية لقيت اللوحة دى , ودى لوحة ممنوع الوقوف قطعيا , وهذا المكان هو موقف للميكروباص , وناس واقفة تحت اللوحة عشان تركب , وهيصة , الموضوع بدا يستفزنى , وبدأت اتوتر وأتنرفز بجد
ودى لوحة ممنوع الوقوف قطعيا , وبرضة عربية راكنة وواقفة عادى , لا حد بياخدها محالفة , ولا ونش بيشيلها , الموضوع بقى فى اللذيذ خالص
ودى لوحة ممنوع الانتظار , والعربية راكنة برضة عادى
ودى بقى المهزلة الكبرى , لوحة غريبة بجد , تقولشى لوحة لبيكاسو , قال ايه , جماهير الغربية , تهنىء المحافظ , والسؤال بقى , من هم جماهير الغربية , ومن قام بدفع تكاليف هذه اللوحة , وياريت بقى كانت لوحة واحده , انما ايه العدد يتعدى ال 50 لوحة بكثير
والصورة دى بتوضع اللوحات ولا بعض
ودى لوحة مكتوب عليها المحاسب مش عارف ايه , رئيس المجلس المحلى , طيب هوه اللى دفع ثمنها , ولا مين نفسى أفهم
ودى مكتوب عليها اسم رئيس الحى , يعنى الموضوع زيتنا فى دقيقنا , ويجعله عامر
ودى دار الكتب , الحاجه الوحيده المحترمة اللى شفتها فى المكان , بس للاسف الفرحة مكملتشى , لان المكتبة تعتبر مكتبة أثرية , يعنى محصلشى عليها تجديد فى الكتب منذ سنوات , انما الكتب اللى مهتمين بيها فى القارءة للجميع هى طبعا كتب اقل ما يقال عنها انها تافهه , وسطحية , الا ما ندر , ويجعله عامر
والصورة دى بتوضح المسافه التى تفصل بين كل لوحة وأخرى من اللوحات اياها , والمبنى على يسار الصورة هو مبنى المحافظة
ودى صورة أوضح له
دى بقى مسخرة , لوحة ممنوع الانتظار وعربية راكنة جنبها , والعربية الشاهين اللى داخلة الشارع دى , داخلة فى شارع ممنوع الدخول فيه , واللوحة موجوده فى الصورة , ولو الصورة كانت أوضح شوية كنت هقولكم على تفاصيل أخرى
وفى النهاية تتمنى لكم , ادارة مرور الغربية رحلة سعيدة , ووقتا ممتعاوأثناء العودة الى الاسكندرية انا , وصديقى قضيناه فى , القاء النكات على مرور الغربية , واخذنا نشاهد الصور التى قمنا بالتقاطها , والضحك بطرية هيستيرية
خلص الموضوع على خير , انتظرونا قريبا جدا , ورجوعا الى عالم السياسه وربنا يستر
At Thursday, November 16, 2006 2:45:00 AM, 
Khaled gad
انت قلبت المدونة سياحة داخلية و تقارير عن محافظات مصر
يا عم سيب اللى يركن فى اى مكان يركن , المشكلة الحقيقية ان مفيش اماكن لركن العربيات و الناس من غلبها بتركن فى اى مكان , اكن اللى صمم شوارع مصر مافتكرش ان المصريين ممكن يقدروا يشتروا عربيات
وحتى لما فكروا يعملوا جلراج تحت الارض فى ميدان التحرير و صرفوا ملايين فشلوا اكن الفلوس دى بيلاقوها فى الشارع او بتنزل من السما
At Thursday, November 16, 2006 11:10:00 PM, saso
ولسه ادخل القري بقي هتلقي الموضوع احلي بكتير
التوك توك الشهير بيتمشي في طريق سريع عاااادي
جرار زراعي سايقة طفل 14سنة بالكتير عااااادي
طريق علي ترعة ولا مرصوف ولا متسوّر والناس والعربيات والعجل ماشيين عادي
يافطة المزلقان وقعت من مية وخمسين سنة والناس وانت ماشي بتقوللك اوعي المزلقان محدش فكر يحط يافطة ورق حتي بدالها ما علينا
تحقيق حلو اوي بجد
At Saturday, November 18, 2006 12:42:00 PM, HANY
شــــمـس الديـن
اتفق انه لو حدث ذلك فى دوله أخرى لقامت الدنيا ولم تقعد , ولكنى أختى الكريمة , لاأريد مصر أن تكون مثل أوروبا أو اى دولة متقدمة , بل اريدها درة , أريدها أن اذهب بها الى ابعد من الممكن , ليس لها مثيل , وشكرا على المجاملة , وتقبلى تحياتى أختى الكريمة
بحب مصر
ازيك يا مان , انا بكون فى القاهرة تقريبا كل يوم ووبقى عايز أكلمك ونتقابل , يا ريت تبعتلى رقمك على الايميل
يا سيدى في أماكن كتير للركن بس تقول ايه بقى للتناحه , والرخامه , وعدين يا راجل ده الحكومه راكنة فى الممنوع
saso
أنا فعلا شفت حاجات زى كده فى أماكن كتير , بس للاسف مكنش معايا الكاميرا عشان أصور , ومرسى على المجاملة
وتقبلى تحياتى أختى الكريمة
At Saturday, November 18, 2006 7:42:00 PM, 
كلام جميل يا هانى
كانك اخدتنى من ايدى ومشتنى معاك خطوه خطوه..
فى بأه العن من كده..روح مطار القاهره الدولى...وانت هتشوف العجب العجاب .. والله الواحد بينكسف قدام الناس اللى راجعني معاى.. ع الاقل ده مولود وزحمه انما دا انت داخل مطار البلد.. فوضى وجرى ورمح وشنط ضايعه
تحياتى يا هانى ما تقطعش الزياره.. وبعد اذن سيادتك هاعمل لينك لمدونتك عندى,, وان شاء الله لما اجى مصر نتقابل
At Monday, November 20, 2006 1:02:00 AM, بالعربي
ياعم انا بتريأ على اللى احنا عاملينه في نفسنا يعني مصر واسعه واحنا ليه مضيقنها علي نفسنا بس هما اللي غلطانين (طبعا انت عارف هما مين )ربنا يجعل كلامنا خفيف عليهم. يعني نبني مدن من غير خدمات؟ مش لازم تبقي جاهزه؟ يعني لو مفيش خدمات بدل مانركن عربياتنا في الصحرا الغربيه لا هتروح الحمام في الصحرا ويبقي عندك حمامين , واحد بيطل علي البحر الأحمر (الصحرا الشرقيه) وواحد بيطل علي ليبيا.شوفت مصر كبيره ازاي
At Thursday, December 07, 2006 4:01:00 PM,
حكيت كثيراً عن مسخرة من مساخر المرور في المنصورة ..
المسخرة ببساطة أنه هناك شارع ضيق "شارع الشيخ علي" يفصل بين شارع عبده معروف (فيه مواقف المراكز) وشارع قناة السويس أحد شوارع المنصورة الرئيسية..
الشارع شديد الضيق لدرجة لا تجعله يتحمل مرور سيارتين فيه .. ومع ذلك فهو اتجاهين!
صدر قرار من إدارة مرور الدقهلية بجعله اتجاهاً واحداً ، ولكن لا حياة لمن تنادي ، والمرور باع القضية..
فضلاً عن التكوين الترابي للشارع والمنطقة ، فإن مرور السيارات من الجانبين يحدث حالة من "الكنس" المستمر يجعل من أجواء الشارع أجواءاً غير صحية ، تصيب المار فيها من أمثالي بالحساسية ، وكان الله في عون سكان الشارع.. وسلم لي على المرور .. وسك ع البك..
ومن ظرافات الطرق في مصر بالمناسبة طريق المنصورة دمياط الذي توجد عليه عشرات أعمدة النور التي لا تضيء ليلاً.. (إلا إذا كان هناك من يعتقد بوجود وظيفة أخرى لعمود النور غير الإضاءة)!
At Friday, December 08, 2006 1:59:00 PM, HANY
قلم جاف
انا كنت ناوى فعلا عمل تقرير عن كافه مدن مصر , وبعدين كسلت , ولكن بعد انا اتصل بى أحد اصدقائى من مدينى طنطا , وقال لى ان المرور شادد حيله والونش مبيونش , قلت مدد يا ايجيبتيمز , باين التقرير جاب نتيجه , وسواء كان نشاط المرور فى طنطا ناتج عن التقرير الذى قدمتى أ, غير ذلك , فقد قررت اكمال المشوار , وعمل تقارير عن باقى المدن
At Friday, December 08, 2006 8:24:00 PM,
مدوّنه لطيفه جدا :) تهنئتى
أحببت أن أعلّق على الفقره المتعلّقه بالسنترال و فترة التخفيض .. التى بت أشعر بعد قراءة مدوّنتك حولها أن موضوع التخفيضات التى تخرج بها علينا الوزاره كل عام مجرّد خدعه إبليسيه .. و المثير أكثر فى الأمر هو العروض و الأوكازينات التى تقدّم لسكّان الساحل الشمالى من تخفيض فى اسعار المكالمات الى تخفيض فى اسعار التركيب و توصيل الخط و غيرها !! وكأن كل قوائم الانتظار بمحافظات مصر الأقل حظّا قد انتهت و لم يعد غير الساحل الشمالى و سكّانه بحاجه لعروض و تخفيضات !!
لا ادري
في اي بلد اخري لو قيل هذا الكلام علي المرور لقلبت الدنيا و لم تقعد
و لكن ربنا لاننا في مصرنا المحروسة نري البدع من هتك لكرامة الانسان و عدم الاكتراث به ... و سلبة ابسط حقوقة ( من تعليم و مسكن و رعاية صحية ادمية ) اعتقج ان التزام احد بقواعد المرور ( او سلوك الالتزام عامة ) اصبح من دروب ا لخيال في بلدنا
تحقيق جميل للغاية ....
مع خالص تحياتي :)