قمت بالاتصال بأحد أصدقائى وهو صاحب مدونة بالعربى وأبديت له رغبتى فى عمل تقرير عن مولد السيد : أحمد البدوى,, وقد وافق علىالفور ثم قمت بالاتصال بصديق لى من طنطا ليقوم بدور المرشد لنا وقد قمنا بالتجول فى مدينة طنطا لمدة يوم كامل من الساعة الثامنة صباحا وحتى التاسعة مساءا وهذه صورة للمسجد من ميدان المحطة
ومن الملاحظ بالطبع التواجد الأمنى المكثف فى كل مكان فى المدينة , وهذا كان واضحا تماما لى منذ اللحظات الاولى لدخولى المدينة , والكمائن فى كل مكان , وأماكن التفتيش , وطبعا كل هذا ليس لحماية الناس ولكنه لحماية( السفير الامريكى ) لأن الرجل كما يقول عنه أهل طنطا موالدجى , أى بتاع موالد , والراجل كل سنة لازم طبعا يزور السيد : أحمد البدوى , بس مبيقراش الفاتحة , ما علينا نرجع لموضوعنا
وده اللى فى الصورة المكان اللى هيبقى قاعد فيه السفير الامريكى , ومعاه بنته , انما المدام مبتجيش معاه ,مش عارف ليه الصراحة , بس باين فى مشاكل بينهم , ما علينا , وهيكون موجود المحافظ وعدد من الوزراء , ومحمد ثروت , وبعض الشخصيات الهامة من محافظة الغربية 
ودى صورة المقصورة من الامام , أى من الباب المطل على المسجد من الداخل , وعلى فكره أنا دخلت جوه المقصورة دى , من الباب الصغير اللى باين فى الصورة , اللى الحريم دول واقفين أمامه , وأول ما أخدت الصورة دى , والفلاش بتاع الكاميرا نور , لقينا الناس بتوع المسجد حوالينا , وعلى كلمة واحده , ( ممنوع يا استاذ ) , فى الاول قلت طنش , بس هم اصروا يصر الحاحا , فقلتلهم فى ايه عادى يعنى , قالوا لا مش عادى ولازم اذن من أمن الدولة , ورغم أنى مش عارف ايه علاقة أمن الدولة بالموضوع بس كان فيه فعلا مخبر من أمن الدولة داخل المكان , المهم سجدنا الناس دى وكملنا تصوير عادى والفضل فى ده يرجع لصاحب مدونة بالعربى , المهم نرجع لموضوعنا 
ودى صورة للمقصورة من الجنب , عشان اديكم صورة متكاملة عن المكان , وانا بصور كده لقيت احد الممثلات فى المكان وكانت لابسة عباءة سوداء , واقتربت من المقصورة , ووضعت يدها عليها , وأخذت فى الدعاء , ما علينا 
ودى صورة من جانب أخر 
ودى صورة قدم أشرف الخلق , قدم سيدنا محمد " صلى الله على محمد صلى الله علية وسلم "أدعولى بقى 
ودى صورة مقامات أخرى ملحقة بالمسجد وهو تلميذ الشيخ احمد البدوى , الشيخ عبد المتعال وأخوتة 
ودى الصورة من الداخل 
ودى صورة كانت معلقة جوة , بس دى هتتنقل بره لما المسجد يتجدد يعنى هتلاقيها على الباب اللى بيدخل للمقصورة من المسجد 
ودى صورة المنبر والمحراب 
والصورة دى للمسجد من جوة , وطبعا ملاحظ ان المسجد بيترمم 
ودى صورة الشباب اللى بيقوموا بالتجديد , وطبعا عند الافتتاح هييجى الوزير وهو بيشرح للرئيس ويقوله ان الترميم تم بايدى مصرية 100فى100 ولم تتم الاستعانه بأى خبرات اجنبية وطبعا كان ممكن يستعينوا بالموالدجى( السفير الامريكى سابقا ) ومش هيتاخر , وان كنت اقطع دراعى ان مكنتشى فلوس الترميم دى فلوس امريكية , ما علينا خلينا فى موضوعنا 
ودى صورة أخرى للمسجد من الداخل , وبالمناسبة يا جماعه محدش يفهم كلامى على السفير, غلط انا مش ضده بالعكس انا بعتبره احسن سفير فى المنطقه كلها , ما علينا 
ودى صورة المحراب , مش محراب المسجد, انما محراب المقصورة 
الصورة دى بقى صورة مش عادية , دى صورة بهديها لناس حبايبى أوى , بقالى كتير مشفتهمش ويا رب نجتمع بيهم قريب 
ودى صورة المسرح اللى هيغنى من عليه محمد ثروت , والناس دى بتدهن الشبابيك وبتظبط شوية حاجات 
وده منظر خارجى للمسرح وكل عام وأنتم بخير
وبالمناسبة دى يا جماعة فى بعض النقاط التى أريد تأصيلها , بالطبع نتذكر جميعا من دراستنا , ان لويس ملك ملوك اوروبا , تم أسره فى دار بن لقمان , ولكن للاسف لم تذكر هذه الكتب أن , من اسره كان السيد : احمد البدوى , فقد كان رحمه الله من ابرز من جاهدوا الصليبيين , ودحرهم , وقد كان صواما قواما
أما ما يحدث من العوام عن قبره , فيجب ان يتصدى له العلماء , ولكن لا ينبغى , أن نسب الرجل , أو ان نقلل من شأنه لصرف الناس عنه فهذا سيكون عين الجهل
وانا اتجول انا وصاحب مدونة بالعربى داخل طنطا , شاهدنا العجب العجاب , وسوف انشره باذن الله فى بوست قادم بعنوان , فساد يا طنطا , ويجعله عامر , وكل عام وانتم بخير
وفى النهاية شكر واجب لشوشو اللى كل الصور دى اتصورت بالكاميرا بتاعتها
At Sunday, November 12, 2006 4:24:00 PM, 
HANY
الديب
بالفعل متفقين على أن تعظيم القبور حرام , لا جدال فى ذلك
وأنا عندما نقلت هذه الصورة فهى على سبيل النقل الصحفى لأمر موجود , ثانيا حتى أوضح من هو البدوى , فلم يكن الرجل درويش ولا شىء من هذا القبيل ولكن كان مجاهدا , صائما , قائما لله تعالى
أما بالنسبة لصورة قدم الرسول و صلى الله عليه وسلم , فهى موجوده فى المسجد الاحمدى بطنطا , مسجد أحمد البدوى , والحجارة التى يوجد عليها قدم الرسول موجوده فى المكان الذى يوجد فيه المقام فى أحد الاركان خلف لوح زجاجى ودى صورتها اللى أنا حطيتها فى الموقع وأن شاء الله لو زرت طنطا قريب هبقى اجيبلكم صورة الشعيرات كمان وور أوضح للقدم الشيف
وبالنسبة لمووع الحدة , فمفيش حدهولا أى حاجه , حضرتك سألت باسلوب مهذب , وأبديت رأيك بكل زوق فمفيش مشكلة حتى لو كنا مختلفين فى الرأى طالما انه ليس هناك تجريح
وتقبل تحياتى اخى الكريم وأهلا بك زائرا كريما
At Monday, November 13, 2006 4:07:00 PM, saso
حظي في واحده من سفاري محو الامية اللي كنت باروحهم.. رحت طنطا المدرسة الصناعي اللي فيها دورة التدريب هناك في شارع الجامع وانا عمري ماباركز في التواريخ لقيت نص مصر واقفة هناك وزحمة وحلقة ذكر وحاجات متصدقش انها موجودة بره رواية يحيي حقي.. المهم كانت فرصة حلوة لما عملت زيك وبدأت انسي المدارس والامية وسنينها وبدأت اصور واسال الناس ان كان اي حد فيهم اصلا يعرف مين هوا احمد البدوي الاحلي انهم ميعرفوش اسم احمد اصلا.. الاحلي انهم ميعرفوش جنسيتة.. والاكتر كان الكلام عن الكرامات.. وريح الضريح والنور الاخضر. تقريبا لازم كل ولي يخرج من ضريحة ضوء اخضر المهم ميرسي علي الصور اللي بعد اذنك هاخدها علي الكومبيوتر عندي ..وعلي مجهودك الكتير في البوست ده
At Thursday, December 07, 2006 4:08:00 PM, 
أرشح لك كتاب "السيد البدوي شيخ وطريقة" للدكتور سعيد عبد الفتاح عاشور .. سلسلة تاريخ المصريين .. الهيئة المصرية للكتاب (أعيد طبعه)..
الكتاب رغم قدمه النسبي (أواخر خمسينات أو ستينات القرن الماضي) إلا أنه عرض لكل ما أثير عن السيد البدوي بشكل حيادي رغم المبالغات التي أحاطت بصورة السيد البدوي إيجاباً.. والكاتب من المتخصصين في مصر المملوكية وله كتب أخرى في نفس السلسلة تتناول نفس الحقبة التي انتشر فيه التصوف وتسيس..
نقطة أخيرة : لا أستبعد أن تكون هناك اتصالات بين الصوفيين وأمريكا التي يهاجمونها في مطبوعاتهم ليل نهار!
السلام عليكم
اظن اننا متفقينعلى حرمانية تعظيم القبور ..حتى لو قبور صالحين ..أو انبياء ..
واضح انك عملت مجهود لنقل صورة كانت بعيدة عن كتير مننا .. بس ايه الفايدة من المجهود ده ؟
عذرا ..
لكن البدوي سواء كان صالح او لا .. حسابه عند ربنا ..
تعريف الناس بيه في الوقت ده مش مطلوب .. لان اغلب الناس على قدر كبير من الجهل .. و قد يذهب لقبره معظما له
و ده أكيد شرك
..
سؤال ..
بجد مش فاهم ايه صورة قدم الرسول صلى الله عليه و سلم ؟؟؟
دي جات منين ؟
هاني .. ياريت ماتضايقش لو حسيت ان كلامي فيه حدة ..
:)
السلام عليكم