Wednesday, March 26, 2008



يا مصر يا ام الاحزان وحشتينى , خلاص تعبت يا بلادى , محتاج احس بالدفا فى حضنك , مش عارف ليه ومرة واحده كده , بقى شغلى الشاغل انى ارجع مصر , يمكن من الاخبار الوحشة الكتير اللى بتجيلى عن مصر , يمكن خايف عليها , يمكن حاسس ان حاجه هتحصل ومش عايز ابقى بعيد وحاجه بتحصل , يمكن حاجات كتير اوى , بس مره واحده لقيتنى محتاج اجازة , لازم ارجع
اخبار العيش والطوابير والحاجات دى مش قلقانى خالص , لانى عارف ان فيه مبالغه كبيرة جدا فى الموضوع , ولا كمان موضوع الاضراب , ولا اى حاجه من اللى فى جرائد المعارضة , اللى قالقنى جدا موضوع الامريكان اللى موتوا مصريين على ارض مصرية ده , الموضوع يمس النظام كله , واستقرار البلد , وقدرتنا على حمايه امننا القومى , الموضوع كبير جدا
مش عارف ازاى الناس دى وصلت بيها الجرأة يعملوا كده , وايه بالظبط اللى هيحصل من تداعيات بعد كده , لو اللى بفكر فيه صحيح , ممكن يحصل تغيير شامل فى مصر على اثر الموضوع ده
اما بخصوص الاضراب العام اللى بيقولوا عليه يوم 6 , انا من دلوقتى اقدر اقول مش هيحصل حاجه , ولا اضراب ولا بتاع , وكله هيرجع زى الاول , الموضوع مش انى بكسر من مقاديف حد , ابدا , انا مبسوط جدا ان ناس بدأت تفكر بالطريقة دى , وانا ناديت قبل كده فى مقاله اتنشرت فى جرائد كتير انه يحصل ثاضراب سلمى شامل , بس الموضوع انى شايف انه مش وقته دلوقتى , مش لازم نستغل موضوع العيش وغيره وثورة الناس ونخليهم يعملوا كده
الفكرة انه حتى لو الحياه تمام والعيش متوفر والمرتبات كويسه , من حقنا نغير النظام لو احنا مش راضيين عنه , او خايفيين على امننا القومى
انما اننا نختزل الموضوع فىرغيف العيش والمرتبات فده خطر , وبيفكرنى بثورة يوليو , او الانقلاب العسكرى اللى سموه ثورة
ما علينا دلوقتى بس يا ريت اكون قدرت اوصل اللى عايز اقوله
انا بكتب بسرعه شوية عشان عندى شغل حالا
ان شاء الله لما ارجع هبقى اكتب مقاله تفصيليه عن الموضوع ده
اشوفكم على خير , وحشتينى يا بلدى
 
posted by HANY at 1:13 PM |


0 Comments: