Monday, November 13, 2006

فى البوست السابق قمت بعمل تقرير عن السيد /: أحمد البدوى , وبعد عمل التقرير , ذهبت أتجول فى شوارع مدينة طنطا أنا وبعض الاصدقاء , وشاهدنا العجب العجاب , رأينا خير اللهم اجعله خير , حالة من التسيب والاهمال , والفساد تعم جميع أرجاء المدينة , ولنبدأ من أول ما شاهدناه , هذه اللوحة موجوده فى شارع البورصة , الشارع التجارى الرئيسى فى المدينة , وقد استرعت اللوحة انتباهى , فقمت على الفور بتصويرها , كشىء غريب , أو غير مألوف ان نراه
وعندما خرجنا من شارع البورصة , فى اتجاهنا الى شارع البحر , الشارع الرئيسى والاهم فى المدينة , وفى بدايتة لاحظت , هذه الكنيسة التى يتم ترميمها , وقال لى صديق من طنطا , أنه فى بداية عملية الترميم , قامت قوات الامن بوضع , اكثر من ثلاث عربات أمن ملركزى فى جوار الكنيسة , تحسبا , لأى أعمال عنف , ولكن عندما وجدوا , انه لاشىء يحدث , ولا ينتظر أن يحدث أى شىء , قاموا بسحبها تدريجيا
وتداعت الى ذهنى على الفور , مناداة بعض الجهلاء بحذف خانة الديانة من البطاقات , شىء غريب فعلا , يعنى واحد اسمه مايكل هيكون ايه يعنى غير مسيحى , مش محتاجه انى انظر الى خانه الديانة , ولا واحد تانى اسمه مصطفى ولا محمد هيكون ايه غير مسلم , وبرضة مش محتاج انى انظر الى خانه الديانة , عشان أعرف كده , انما لو عايزين يحصل اندماج حقيقى يبقى مفيش داعى للحساسية الشديدة فى التعامل مع الامور التافه , زى ترميم كنيسة , او بناء كنيسة , أو غيره
وبعدين ايه لازمة حارس الامن الموجود على باب الكنيسة ده, هيحميها من مين , حقيقى مش فاهم , فى رأيى أن المشكلة الحقيقية تقبع تحت ستار الانتماء , هل ننتمى الى اسلامنا أولا ام الى مصريتنا , وهل ننتمى الى الدين المسيحى بالدرجة الاولى أم الى مصر , عندما نجيب على هذا السؤال , لن نحتاج بعدها الى هذه الدعاوى الفارغة , وحتى لا أطيل فلكل مقام مقال , ودعونا نتابع
بعد الكنيسة دى بخطواط موجود لوحة ممنوع الوقوف قطعيا , ولاحظت أن الاوتوبيس واقف هناك وبيحمل كمان , مع العلم انه على بعد اقل من 30 متر يوجد موقف للاوتوبيس
ودى صورة المكان المخصص لوقوف الاوتوبيس وطبعا مبيقفش هناك
وبعدين واحنا ماشيين , لقينا اللوحة دى , المكان الموجود فيه الخيمة دى , المفروض انه مكان انتظار للسيارات , فأنا اقترح على ادراة المرور الاتى , اما أن يقوموا بازالة اللوحة , أو ازالة الخيمة , ويجعله عامر
ودى لوحة أخرى ممنوع الانتظار , واللى واقفة دى عربية شرطة , يعنى من الاخر كده حاميها حراميها , وكل عام وانتم فى الانتظار
وبعد ذلك , اثناء سيرنا وصلنا بالقرب من سنترال طنطا , ووجدت رجل يرتدى جلابية يخرج من السنترال وهو يقول يلعن ابوكم ولاد ***, فاسترعى ذلك انتباهى , وذهبت للرجل وتحدثت معه , فقال لى , انه عندما يقوم رئيس الشركة المصرية للاتصالات بعمل تخفيض على رسوم تركيب خطوط التليفون , يقوم سنترال طنطا بوقف التعاقد فى فتره التخفيض , وبعد انتهائها , يقومون بفتح التعاقد , وقد تكرر ذلك أكثر من مرة , وهم الان واقفين التعاقد حتى أخر العام , أى حتى انتهاء فترة التخفيض , وقد تأكدت من ذلك بنفسى , يعنى فساد من الاخر
وبعد ما مشينا شوية لقيت اللوحة دى , ودى لوحة ممنوع الوقوف قطعيا , وهذا المكان هو موقف للميكروباص , وناس واقفة تحت اللوحة عشان تركب , وهيصة , الموضوع بدا يستفزنى , وبدأت اتوتر وأتنرفز بجد
ودى لوحة ممنوع الوقوف قطعيا , وبرضة عربية راكنة وواقفة عادى , لا حد بياخدها محالفة , ولا ونش بيشيلها , الموضوع بقى فى اللذيذ خالص
ودى لوحة ممنوع الانتظار , والعربية راكنة برضة عادى
ودى بقى المهزلة الكبرى , لوحة غريبة بجد , تقولشى لوحة لبيكاسو , قال ايه , جماهير الغربية , تهنىء المحافظ , والسؤال بقى , من هم جماهير الغربية , ومن قام بدفع تكاليف هذه اللوحة , وياريت بقى كانت لوحة واحده , انما ايه العدد يتعدى ال 50 لوحة بكثير
والصورة دى بتوضع اللوحات ولا بعض
ودى لوحة مكتوب عليها المحاسب مش عارف ايه , رئيس المجلس المحلى , طيب هوه اللى دفع ثمنها , ولا مين نفسى أفهم
ودى مكتوب عليها اسم رئيس الحى , يعنى الموضوع زيتنا فى دقيقنا , ويجعله عامر
ودى دار الكتب , الحاجه الوحيده المحترمة اللى شفتها فى المكان , بس للاسف الفرحة مكملتشى , لان المكتبة تعتبر مكتبة أثرية , يعنى محصلشى عليها تجديد فى الكتب منذ سنوات , انما الكتب اللى مهتمين بيها فى القارءة للجميع هى طبعا كتب اقل ما يقال عنها انها تافهه , وسطحية , الا ما ندر , ويجعله عامروالصورة دى بتوضح المسافه التى تفصل بين كل لوحة وأخرى من اللوحات اياها , والمبنى على يسار الصورة هو مبنى المحافظة
ودى صورة أوضح له
دى بقى مسخرة , لوحة ممنوع الانتظار وعربية راكنة جنبها , والعربية الشاهين اللى داخلة الشارع دى , داخلة فى شارع ممنوع الدخول فيه , واللوحة موجوده فى الصورة , ولو الصورة كانت أوضح شوية كنت هقولكم على تفاصيل أخرى
وفى النهاية تتمنى لكم , ادارة مرور الغربية رحلة سعيدة , ووقتا ممتعا
وأثناء العودة الى الاسكندرية انا , وصديقى قضيناه فى , القاء النكات على مرور الغربية , واخذنا نشاهد الصور التى قمنا بالتقاطها , والضحك بطرية هيستيرية
الى من يتساءل عن نزيف الاسفلت , والحوادث التى تحدث كل يوم فى مصر , حتى استطاعت ادرارات المرور فى مصر ان تجعل مصر تحتل المركز الثانى عالميا فى رقم من يقتلون يوميا على طرقها , فهنيئا لكى يا مصر رجال مرورك الاوفياء , ويجعله عامر , والله يخرب بيتنا احنا يا شيخ
خلص الموضوع على خير , انتظرونا قريبا جدا , ورجوعا الى عالم السياسه وربنا يستر
 
posted by HANY at 11:25 PM | 19 comments
Thursday, November 09, 2006

قمت بالاتصال بأحد أصدقائى وهو صاحب مدونة بالعربى وأبديت له رغبتى فى عمل تقرير عن مولد السيد : أحمد البدوى,, وقد وافق علىالفور
ثم قمت بالاتصال بصديق لى من طنطا ليقوم بدور المرشد لنا وقد قمنا بالتجول فى مدينة طنطا لمدة يوم كامل من الساعة الثامنة صباحا وحتى التاسعة مساءا وهذه صورة للمسجد من ميدان المحطة

ومن الملاحظ بالطبع التواجد الأمنى المكثف فى كل مكان فى المدينة , وهذا كان واضحا تماما لى منذ اللحظات الاولى لدخولى المدينة , والكمائن فى كل مكان , وأماكن التفتيش , وطبعا كل هذا ليس لحماية الناس ولكنه لحماية( السفير الامريكى ) لأن الرجل كما يقول عنه أهل طنطا موالدجى , أى بتاع موالد , والراجل كل سنة لازم طبعا يزور السيد : أحمد البدوى , بس مبيقراش الفاتحة , ما علينا نرجع لموضوعنا


وده اللى فى الصورة المكان اللى هيبقى قاعد فيه السفير الامريكى , ومعاه بنته , انما المدام مبتجيش معاه ,مش عارف ليه الصراحة , بس باين فى مشاكل بينهم , ما علينا , وهيكون موجود المحافظ وعدد من الوزراء , ومحمد ثروت , وبعض الشخصيات الهامة من محافظة الغربية


ودى صورة المقصورة من الامام , أى من الباب المطل على المسجد من الداخل , وعلى فكره أنا دخلت جوه المقصورة دى , من الباب الصغير اللى باين فى الصورة , اللى الحريم دول واقفين أمامه , وأول ما أخدت الصورة دى , والفلاش بتاع الكاميرا نور , لقينا الناس بتوع المسجد حوالينا , وعلى كلمة واحده , ( ممنوع يا استاذ ) , فى الاول قلت طنش , بس هم اصروا يصر الحاحا , فقلتلهم فى ايه عادى يعنى , قالوا لا مش عادى ولازم اذن من أمن الدولة , ورغم أنى مش عارف ايه علاقة أمن الدولة بالموضوع بس كان فيه فعلا مخبر من أمن الدولة داخل المكان , المهم سجدنا الناس دى وكملنا تصوير عادى والفضل فى ده يرجع لصاحب مدونة بالعربى , المهم نرجع لموضوعنا


ودى صورة للمقصورة من الجنب , عشان اديكم صورة متكاملة عن المكان , وانا بصور كده لقيت احد الممثلات فى المكان وكانت لابسة عباءة سوداء , واقتربت من المقصورة , ووضعت يدها عليها , وأخذت فى الدعاء , ما علينا


ودى صورة من جانب أخر


ودى صورة قدم أشرف الخلق , قدم سيدنا محمد " صلى الله على محمد صلى الله علية وسلم "أدعولى بقى


ودى صورة مقامات أخرى ملحقة بالمسجد وهو تلميذ الشيخ احمد البدوى , الشيخ عبد المتعال وأخوتة


ودى الصورة من الداخل


ودى صورة كانت معلقة جوة , بس دى هتتنقل بره لما المسجد يتجدد يعنى هتلاقيها على الباب اللى بيدخل للمقصورة من المسجد


ودى صورة المنبر والمحراب


والصورة دى للمسجد من جوة , وطبعا ملاحظ ان المسجد بيترمم


ودى صورة الشباب اللى بيقوموا بالتجديد , وطبعا عند الافتتاح هييجى الوزير وهو بيشرح للرئيس ويقوله ان الترميم تم بايدى مصرية 100فى100 ولم تتم الاستعانه بأى خبرات اجنبية وطبعا كان ممكن يستعينوا بالموالدجى( السفير الامريكى سابقا ) ومش هيتاخر , وان كنت اقطع دراعى ان مكنتشى فلوس الترميم دى فلوس امريكية , ما علينا خلينا فى موضوعنا


ودى صورة أخرى للمسجد من الداخل , وبالمناسبة يا جماعه محدش يفهم كلامى على السفير, غلط انا مش ضده بالعكس انا بعتبره احسن سفير فى المنطقه كلها , ما علينا


ودى صورة المحراب , مش محراب المسجد, انما محراب المقصورة


الصورة دى بقى صورة مش عادية , دى صورة بهديها لناس حبايبى أوى , بقالى كتير مشفتهمش ويا رب نجتمع بيهم قريب


ودى صورة المسرح اللى هيغنى من عليه محمد ثروت , والناس دى بتدهن الشبابيك وبتظبط شوية حاجات


وده منظر خارجى للمسرح وكل عام وأنتم بخير

وبالمناسبة دى يا جماعة فى بعض النقاط التى أريد تأصيلها , بالطبع نتذكر جميعا من دراستنا , ان لويس ملك ملوك اوروبا , تم أسره فى دار بن لقمان , ولكن للاسف لم تذكر هذه الكتب أن , من اسره كان السيد : احمد البدوى , فقد كان رحمه الله من ابرز من جاهدوا الصليبيين , ودحرهم , وقد كان صواما قواما

أما ما يحدث من العوام عن قبره , فيجب ان يتصدى له العلماء , ولكن لا ينبغى , أن نسب الرجل , أو ان نقلل من شأنه لصرف الناس عنه فهذا سيكون عين الجهل

وانا اتجول انا وصاحب مدونة بالعربى داخل طنطا , شاهدنا العجب العجاب , وسوف انشره باذن الله فى بوست قادم بعنوان , فساد يا طنطا , ويجعله عامر , وكل عام وانتم بخير

وفى النهاية شكر واجب لشوشو اللى كل الصور دى اتصورت بالكاميرا بتاعتها

 
posted by HANY at 12:20 AM | 15 comments